صينية مكرونة مسكرة (اللي بالكراميل) وسمعت ان بيقولوا عليها

النهاردة أنا جايبالكوا نوع من الحلويات المصرية

مش كل الناس عارفينها

ويمكن اللي بيدوقها لأول مرة وهو مش متعود عليها قليل بيحبوها

وأنا كذا مره اكلتها وعجبتني جدا

هي شبه المكرونة بالبشاميل بس مسكرة

وعشان هي مختلفة ومش الكل عارفها قلت أجيبهالكوا ويارب تعجبكوا

المقادير

1 كيلو سكر

1/2 كيلو مكرونة عادية الصغيرة دي

حوالي 12 بيضة

كيلو ونصف لبن

2 ملعقة كبيرة سمن بلدي

وعلى فكرة لو عايزين تقللوا السكر براحتكوا بس دي المقادير اللي متعارف عليها

الطريقة

نسلق المكرونة عادي في ماء مغلي

نجيب الصينية اللي هنعمل فيها المكرونة

نخلط فيها السكر والسمنة مع بعض كويس وبعدين نضيف عليهم البيض

ونضربه كويس بالمعلقة مش بمضرب البيض لحد مانلاقي ان الخليط بقى متجانس مع بعضه

ونضيف بعد كده المكرونة المسلوقة ونقلب كويس

وبعد كده نضيف اللبن

ولو حبيتي ترشي سكر أو جوز هند على الوش حلو

بعد كده نحطها في فرن درجته عالية لمدة 10 دقايق تاخد لون بس

ونرش السكر عليها وقشطة (لو مش عايزين مش مشكلة)

وبعدها حوالي ساعة إلا ربع على نار هادية في الفرن برضه

بس الوقت ده حسب ماتحسي انها تماسكت

يعني هزي الصنية لو حسيتي انها تماسكت مش زي الأول اطفي عليها علطول

لأنك لو سبتيها أكتر هتبقى مجلدة

والخليط اللي مع المكرونة هو نفسه بتاع الكريم كراميل عشان كده ممكن تلاقي الطعم متقارب

وبعد ما تطلع من الفرن سيبيها تبرد وحطيها في الثلاجة

تؤكل باردة